Type: Korpi Maħtura Uffiċjalment

Gozo Sports Board

L-għan ewlieni tal-Gozo Sports Board huwa li jiżviluppa, jippromwovi, jikkontrolla u jirregola l-isport fil-forom kollha tiegħu fit-territorju kollu tal-gżira Għawdxija, fi spirtu ta’ fair play u f’konformità mar-regoli, bye-laws u r-regolamenti kollha kif jista’ jkun fis-seħħ minn żmien għal żmien.

Kunsill Kulturali

L-għan ewlieni tal-Kunsill Kulturali huwa li jippromwovi s-setturi tal-kultura u kreattivi kif ukoll li jippromwovi t-talenti lokali li jappartjenu għall-arti Viżwali u Performattiva.

Sabiex jintlaħqu dawn l-għanijiet, il-Kunsill tal-Kultura jorganizza diversi attivitajiet kulturali matul is-sena. Il-Kunsill jiltaqa’ regolarment sabiex jiddiskuti u jimplimenta diversi attivitajiet fosthom: tnedijiet ta’ kotba li l-aktar huma miktuba minn awturi lokali, inawgurazzjoni ta’ Monumenti ta’ diversi ikoni Għawdxin li tul ħajjithom onoraw il-gżira għeżież tagħhom, wirjiet tal-arti, kunċerti mużikali u wirjiet taż-żfin.

Il-Kunsill jassigura li l-attivitajiet kulturali organizzati minnu jilħqu nies b’gosti differenti u gruppi ta’ etajiet differenti fis-soċjetà. Il-Kunsill Kulturali jistinka biex jinkoraġġixxi l-involviment tal-komunità lokali f’dawn l-attivitajiet kulturali sabiex jassigura li l-Kultura Għawdxija tibqa’ ta’ kburija għall-ġenerazzjonijiet futuri.

Dwejra Opportunity Fund​

L-għanijiet ewlenin tad-Dwejra Opportunity Fund huma li jiġġeneraw fondi biex jappoġġjaw inizjattivi ta’ riċerka u konservazzjoni fuq siti ta’ wirt naturali u kulturali f’Għawdex u Kemmuna. Id-DOF se tistinka biex tinkoraġġixxi l-involviment tal-komunità lokali, il-partijiet interessati u l-gruppi ta’ interess biex jaħdmu għall-għan komuni li jiġi żgurat li l-wirt ta’ Għawdex u Kemmuna jibqa’ sors ta’ kburija u ispirazzjoni għall-ġenerazzjonijiet futuri.

AMBITU:

Id-Dwejra Opportunity Fund twaqqaf fl-2018 mill-Gvern ta’ Malta bħala reazzjoni diretta għall-kollass tat-Tieqa ikonika tal-Azure, bil-għan li telfa tinbidel f’opportunità ġdida għal Għawdex.

Il-fond huwa mmexxi minn kumitat li l-għan ewlieni tiegħu huwa li jfittex fondi sabiex jappoġġja inizjattivi ta’ riċerka li jiffokaw fuq siti ta’ wirt naturali jew proġetti ta’ natura kulturali f’Għawdex. Il-kumitat DOF jemmen li l-preservazzjoni tal-wirt hija parti essenzjali ta’ kull nazzjon li jistma lilu nnifsu.

Il-kumitat għalhekk ifittex li jippromwovi u jaħdem lejn l-ideal li s-soċjetà, kollha kemm hi, għandha tieħu r-responsabbiltà għall-assi storiċi, kulturali u naturali tagħha.

Permezz ta’ varjetà ta’ inizjattivi ta’ għarfien pubbliku u ta’ finanzjament, il-Kumitat DOF jistinka biex jinkoraġġixxi l-involviment tal-komunità lokali, il-partijiet interessati u l-gruppi ta’ interess biex jaħdmu għall-għan komuni li jiġi żgurat li l-wirt t’Għawdex jibqa’ sors ta’ kburija u ispirazzjoni għall-ġenerazzjonijiet futuri.